Жаңалықтар

2025 жылғы 21 қарашада Халықаралық «Астана» университетінде магистратураның екінші курс студенттері, «Шет тілін: екі тілде оқыту» білім беру бағдарламасы бойынша педагогикалық практика аясында, «The Story of Fairy-Tale: How AI Creates Stories» тақырыбында сыртқы сабақтан тыс іс-шара өткізілді. Іс-шараға 22:9 тобының студенттері қатысты.

Іс-шараны ұйымдастырып, өткізген магистраттар: Шетел тілі 24 Б тобының Ануарбек Диас, Шырын Бахытқызы, Кононова Анна, Зикиров Ерасыл, Серикова Жаннур, Сейфуллина Жасмина және Срымова Сабина. Сабақ барысында қатысушылар жасанды интеллект технологияларын пайдалана отырып, ертегілер құруға арналған материалдарды таныстырды, ИИ мүмкіндіктері мен шектеулерін әдеби шығармашылықта талқылады, сондай-ақ мәтінмен және аудиториямен интерактивті жұмыс жасау әдістерін көрсетті.

Іс-шара шет тілін оқыту кафедрасының аға оқытушылары Култанова Ж.М. және Сайфуллаева Н.Б. басшылығымен өткізілді және студенттердің шығармашылық және сын тұрғысынан ойлау қабілеттерін дамытуға, заманауи технологияларды пайдалана отырып шет тілін оқыту дағдыларын жетілдіруге, сондай-ақ цифрлық құралдарды білім беру процесіне интеграциялауға қызығушылықты арттыруға бағытталған.

Іс-шараны жүзеге асыру магистраттарға кәсіби құзыреттерін, шығармашылық көзқарасын және командалық жұмыс жасау қабілетін көрсетуге мүмкіндік берді, сондай-ақ практикалық бағытталған оқыту жағдайында педагогикалық дағдыларын дамытуға септігін тигізді.

28 қараша күні Астана халықаралық университетінің президенті С.А. Ирсалиев Ғылым және жоғары білім министріне арналған әлеуметтік иноваторлар қауымдастығының  таныстырылымына қатысты.

Астана халықаралық университеті -ТМД мен Орталық Азия аумағында әлеуметтік кәсіпкерлік бойынша магистрлер даярлайтын алғашқы университеттердің бірі. Біз бизнес пен қоғамдық жауапкершілік тоғысатын қазіргі заманның ең маңызды бағыттарының бірін дамытып отырғанымызды зор мақтаныш деп санайды.

Бүгінде әлеуметтік кәсіпкерлер қоғам дамуына ерекше үлес қосуда - олар әлеуметтік мәселелерді шешуге бағытталған инновациялық жобалар жасап, экономикалық өсімге елеулі ықпал етеді. Халықаралық зерттеулерге сәйкес, әлемдік ЖІӨ-нің шамамен 2%-ы әлеуметтік кәсіпкерлердің қызметі арқылы қалыптасады. Олардың әлеуметтік әсерінің маңызын бағалаусыз қалдыру мүмкін емес.

AIU-да әлеуметтік инновациялар экожүйесі қалыптасып келеді. Университетте әлеуметтік кәсіпкерлік бағытында толыққанды экожүйе жасалуда. Атап айтсақ, «Өрелі ұрпақ» әлеуметтік кәсіпкерлік мектебі ҚР Ақпарат және қоғамдық даму министрлігінің жобасы аясында төрт жыл бойы табысты жүзеге асырылып келеді. Осы уақыт ішінде 800-ден астам әлеуметтік кәсіпкер мен үкіметтік емес ұйым өкілдері оқытылды;

Әлеуметтік кәсіпкерлікке арналған бір ғылыми жоба сәтті аяқталды, ал екінші гранттық ғылыми жоба - мүмкіндігі шектеулі жандарды жұмыспен қамту мәселесінің ғылыми негіздері бойынша - жалғасып келеді;

Әлеуметтік инновациялық қауымдастықта Astana International University үшін білім беру саласындағы стратегиялық серіктес ретінде арнайы эксклюзивті аймақ ашылды;

AIU түлегі Эмин Аскеров әлеуметтік бастамаларды табысты жүзеге асырып, жаңа буын көшбасшыларын шабыттандыруда. Министрмен өткен кездесу - бағыттың стратегиялық маңызын тағы да айқындады

AIU президенті С.А. Ирсалиев, әлеуметтік инновациялық қауымдастықтың  негізін қалаушы Эмин Аскеров және ҚР Ғылым және жоғары білім министрі Саясат Нұрбектің кездесуі бұл саланың маңыздылығы мен болашағы зор екенін тағы бір мәрте дәлелдеді.

Әлеуметтік кәсіпкерлік мамандарын даярлау - тұрақты болашаққа салынған инвестиция. «Әлеуметтік кәсіпкерлік» білім беру бағдарламасы қоғамға пайда әкелетін, экономиканың дамуына үлес қосатын, әлеуметтік құндылық жасай алатын жаңа формация көшбасшыларын дайындайды. AIU үшін бұл бағыт - еліміздің әлеуметтік тұрақтылығын арттыруға және азаматтардың өмір сапасын жақсартуға бағытталған ұзақ мерзімді стратегиялық миссиясы.

10 қарашада басталып, 15 қараша - Дүниежүзілік қайта өңдеу күніне орай ұйымдастырылған Astana International University-дің Жаратылыстану ғылымдары жоғары мектебінің ЭкоЧелленджі өз мәресіне жетті. Экологиялық мәдениетті дамытуға бағытталған бұл іс-шараның қорытындысы 28 қараша күні жарияланды.

ЭкоЧеллендж G-Global жасыл экономика мен даму коалициясы мен Astana International Universityарасындағы меморандум аясында жүзеге асырылып отырған Restart жобасының маңызды бөлігі болып табылады.

Restart жобасы: кезеңдік даму және экологиялық сауаттылықты арттыру

Университет студенттері арасында қалдықтарды дұрыс басқару мәдениетін қалыптастыруға бағытталған Restart жобасы бірнеше кезең бойынша жүйелі түрде жүзеге асырылуда.

🔹 AIU студенттері 2024 жылдан бастап пластик қалдықтарын Sparklo фандоматтарына тапсыру арқылы қайта өңдеудің қолжетімді тетіктерін белсенді қолдана бастады.

🔹 2025 жылы жоба инфрақұрылымы кеңейіп, пластик қалдықтарын қабылдау бағыттары толықтырылды: Freedom фандоматтары, LS Astana – қайталама шикізатты қабылдау және өңдеу пункті.

LS Astana - тұрмыстық қатты қалдықтарды қабылдап, сұрыптап және қайта өңдеу кәсіпорындарына жөнелтетін экологиялық орталық. Студенттердің бұл пунктті белсенді пайдалануы экологиялық сауаттылықтың артуын көрсетеді.

Экочеллендж нәтижелері

Челлендж нәтижесінде келесі көрсеткіштер тіркелді:

·       50-ден астам бейнеролик қабылданды;

·       500 студент белсенді қатысты;

·       500 кг пластик қалдығы қайта өңдеуге жіберілді.

Бұл көрсеткіштер студенттердің тұрақты даму бастамаларына деген жоғары қызығушылығын көрсетеді.

Жеңімпаздар

🥇 1орын – ЭиП 25A тобы

🥈 2 орын – ИЯ 24-3 тобы

🥉 3 орын –Химия 24А тобы

ЭкоЧеллендж арқылы келесі БҰҰ Тұрақты даму мақсаттарына үлес қосылды:

ТДМ 11 – Тұрақты қалалар мен қауымдастықтар, ТДМ 12 – Жауапты тұтыну және өндіріс, ТДМ 13 – Климаттың өзгеруімен күрес, ТДМ 17 – Серіктестікті дамыту

10-28 қараша аралығында өткен, 15 қараша - Дүниежүзілік қайта өңдеу күніне арналған ЭкоЧеллендж AIU студенттерінің экологиялық жауапкершілігін арттырып, қайта өңдеу мәдениетін жандандыра түсті. Restart жобасы мен G-Global жасыл экономика мен даму коалициясымен серіктестік университеттің тұрақты даму бағыты бойынша маңызды қадамдардың бірі болып табылады.

AIU келешекте де экологиялық бастамаларды қолдауды және ТДМ бағыттарын жүзеге асыруды жалғастырады.

Ұйымдастырушылар: Қыдырова Айдана Саламатқызы, Карабалаева Айман Бейсембаевна

Астана халықаралық университетінде Университеттің Психологиялық қызметі ұйымдастырған «Психологиялық денсаулық апталығы» шеңберінде 21 қараша күні «Мазасыздық пен депрессия: стрессті психикалық бұзылудан қалай ажыратуға болады?» тақырыбында интерактивті дәріс өтті. Шараның спикері - дәрігер-психиатр, психотерапевт А.Б. Жауков.

Дәріс барысында маман мазасыздық пен депрессияның негізгі белгілерін, олардың пайда болу себептерін, сондай-ақ ұзаққа созылатын стресс пен психикалық бұзылулардың айырмашылықтарын кеңінен түсіндірді. Студенттер өздерін толғандырған сұрақтарды қойып, нақты клиникалық мысалдар негізінде пікірталасқа қатысып, психологиялық саулықты сақтауға бағытталған практикалық ұсыныстар алды.

Шара қатысушылардың психикалық денсаулық туралы білімін кеңейтіп, қиын жағдайларда өзіне-өзі көмек көрсету дағдыларын қалыптастыруға мүмкіндік берді. Университет тарапынан ұйымдастырылған бұл бастама жастар арасында психологиялық мәдениетті арттыруға бағытталған маңызды қадам болды.

            Астана халықаралық университеті, жаратылыстану ғылымдары Жоғары мектебінің РГиТ -25 оқу тобында пән оқытушысы Н.С. Ауезова 25 қараша күні «Геология және геоморфология»  пәні бойынша жарыс форматында ашық сабақ өткізді.

            Ашық сабақтың басты мақсаты - студенттердің теориялық білімдерін бекіту, геологиялық үрдістер мен жер бедері пішіндерін тану қабілетін арттыру, командалық жұмыс дағдыларын дамыту болды. Жарыс форматы студенттердің қызығушылығын арттырып, белсенді қатысуына мүмкіндік берді. Топтар өзара бәсекеге түсіп, әр кезең бойынша білімдерін шығармашылықпен көрсетті. Сабақ барысында интерактивті сұрақтар, тапсырмалар, картамен жұмыс және геоморфологиялық объектілерді анықтау сияқты бөлімдер қамтылды.

         Ашық сабақ жоғары деңгейде өтіп, студенттерге мотивация берді және пәннің маңызын терең түсінуге ықпал етті.

2025 жылғы 27 қарашада Е.А. Бөкетов атындағы Қарағанды ұлттық зерттеу университетінің биология-география факультетінің ғалымдары ғылыми ынтымақтастық аясында Астана халықаралық университетінің «Nature Lab» ғылыми-зерттеу зертханасына келіп, бірқатар ғылыми-оқытушылық іс-шаралар ұйымдастырылды.

          Кездесу барысында б.ғ. к., жетекші ғылыми қызметкер Ишмуратова М.Ю., б.ғ. к., ботаника кафедрасының меңгерушісі Тлеуканова С.У., сондай-ақ ғылыми қызметкер Мусина Р.Т. AIU Жаратылыстану ғылымдары жоғары мектебі оқытушылары, студент, докторанттар және жас ғалым зерттеушілер үшін «Өсімдік нысандарын микроскопиялық зерттеу әдістері» тақырыбында оқу-әдістемелік семинар өткізді.

Семинар кезінде қатысушылар:

1.     өсімдік тіндерін микроскопиялық талдау әдістерімен танысты;

2.     өсімдіктердің анатомиялық және морфологиялық құрылымдарын зерттеу тәсілдерін қарастырды;

3.     оптикалық және цифрлық микроскоптармен жұмыс істеудің практикалық дағдыларын меңгерді;

4.     үлгілерді дайындау кезеңдері мен микропрепараттарды талдау үдерісін бақылады.

Сонымен қатар ғылыми қызметкерлерге «Nature Lab» зертханасының инфрақұрылымы таныстырылды: өсімдіктерді генотиптеуге арналған жабдықтар, биологиялық белсенділікті анықтау әдістері және морфологиялық зерттеулер бағыттары. Тараптар бірлескен ғылыми жобаларды іске асыру, ғылыми жарияланымдар дайындау және зерттеу нәтижелерімен алмасу перспективаларын талқылады.

Астана халықаралық университеті Қарағанды ұлттық зерттеу университетінің әріптестеріне нәтижелі ынтымақтастығы үшін алғыс білдіреді. Өткізілген семинар екі университет арасындағы ғылыми байланысты нығайтуға және жас ғалымдардың кәсіби құзыреттерін арттыруға ықпал етті.

21 қараша күні Астана қаласындағы Haileybury халықаралық мектебінде елдегі экологиялық мәдениетті, волонтерлікті және тұрақты даму қағидаттарын ілгерілетуді мақсат еткен “Green Steppe: Әр қадамдағы экоойлылық” жобасының баспасөз конференциясы өтті. Іс-шараға экология саласының сарапшылары, жобаның өңірлік үйлестірушілері, білім беру ұйымдарының өкілдері, жас эковолонтерлер мен мемлекеттік құрылымдар қатысты.

Баспасөз конференциясында көтерілген мәселелер Қазақстан қоғамы үшін өзекті. Соңғы жылдары климаттың өзгеруі, биоалуантүрліліктің азаюы, ауаның ластануы және табиғи ресурстардың шамадан тыс пайдаланылуы елімізде экологиялық жауапкершілікті күшейтуді талап етіп отыр. Бұл ретте экобілім мен экологиялық мәдениет қалыптастырудың маңызы айқын көрінуде.

Іс-шарада Астана халықаралық университетінің Жаратылыстану жоғары мектебінің аға оқытушысы, эколог, PhD Айман Карабалаева сөз сөйлеп, «Жас ғалым» жобасы аясында жүзеге асырылып жатқан бастамалар туралы баяндады. Ол еліміздегі экожүйелерді қалпына келтіру бағдарламаларының ғылыми негіздері мен жастарды табиғатты қорғауға ынталандыру тетіктерін атап өтті.

ЖҒЖМ AIU аға оқытушысы, PhD Шолпан Бисембаевна Абилова «Биоалуантүрлілікті сақтау» тақырыбында баяндама жасап, табиғи тепе-теңдікті ұстап тұрудың, сирек кездесетін түрлерді қорғаудың және қоғамның экологиялық жауапкершілігін арттырудың маңызын көрсетті.

Ал ЖҒЖМ AIU оқытушы-докторант, эколог әрі экоактивист Айдана Саламатқызы Қыдырова мектеп оқушылары мен жастар арасында экологиялық өмір салтын енгізудің тәжірибелік тәсілдерін ұсынды. Оның айтуынша, экологиялық әдеттерді ерте жастан қалыптастыру - болашақта тұрақты дамуға қол жеткізудің негізгі кепілі.

“Green Steppe” жобасы бір жыл ішінде мыңдаған жас волонтерді тартып, ондаған экологиялық бастамалардың жүзеге асуына жол ашты. Еліміздің көптеген мектептерінде экоклубтар ашылып, экологиялық білім беру жаңа деңгейге көтерілді. Бұл - экология мәдениетін қалыптастырудың жүйелі түрде жүргізіліп жатқанын көрсететін маңызды көрсеткіш.

Сонымен қатар жоба аясында тұрақты даму мақсаттарын (ТДМ) жүзеге асыру бағытында нақты нәтижелер байқалады. Атап айтқанда:

·         ТДМ 4 - Сапалы білім: экологиялық сауаттылықты арттыруға арналған оқу модульдері енгізілуде;

·         ТДМ 11 - Тұрақты қалалар мен елді мекендер: қалалық ортадағы экологиялық жобалар саны артты;

·         ТДМ 13 - Климаттың өзгеруімен күрес: ағаш отырғызу, қалдықтарды басқару және табиғатты қалпына келтіру шаралары тұрақты түрде өткізіледі;

·         ТДМ 15 - Құрлық экожүйелерін сақтау: сирек түрлерді қорғау және табиғи резерваттарды күшейту бастамаларына қолдау көрсетілуде;

·         ТДМ 17 - Әріптестік: мемлекеттік органдар, білім беру мекемелері, ҮЕҰ және еріктілер қозғалысы арасында ынтымақтастық нығайды.

Жасыл болашаққа бағытталған қадам

Баспасөз конференциясы қоғамдық экосананы қалыптастыруда диалогтың маңызы зор екенін дәлелдеді. Сарапшылар, мұғалімдер мен жастардың бір алаңда бас қосуы экологиялық жауапкершілікті арттыруға, жаңа идеялар мен бастамаларды талқылауға мүмкіндік берді.

Қоршаған ортаны қорғау - тек бір ұйымның немесе бір саланың ғана емес, бүкіл қоғамның ортақ міндеті. “Green Steppe” сияқты жобалар елімізде экологиялық мәдениетті нығайтып, жас ұрпақты табиғатты аялауға тәрбиелеуге зор үлес қосуда.

2025 жылғы 26 қараша күні  Astana International University қабырғасында Қазақстан Республикасы Қаржылық мониторинг агенттігінің өкілдерімен студенттердің кездесуі өтті. Іс-шара экономика, қаржы, менеджмент, маркетинг және ақпараттық технологиялар бағыты бойынша білім алып жатқан болашақ мамандарды тәжірибеге бағытталған оқыту аясында ұйымдастырылды.

Кездесу барысында спикерлер Агенттіктің негізгі қызмет бағыттары туралы айтып, қаржылық құқықбұзушылықтардың алдын алу, көлеңкелі операцияларға және экономикалық қылмыстарға қарсы іс-қимылдың қазіргі тәсілдерімен бөлісті. Сонымен қатар жастардың құқықтық және қаржылық сауаттылығын арттыру, мемлекеттік басқарудағы ашықтық пен есептілік қағидаттарының маңызы, сыбайлас жемқорлыққа қарсы мәдениетті қалыптастыру мәселелеріне ерекше назар аударылды.

Студенттер мамандарға сұрақ қойып, нақты практикалық кейстерді талқылап, қаржылық мониторинг саласындағы мемлекеттік органдардың жұмысымен жақынырақ танысу мүмкіндігіне ие болды.

Astana International University Агенттік өкілдеріне және барлық қатысушыларға белсенді диалог пен жоғары қызығушылық танытқаны үшін алғыс білдіреді. Бұл кездесу университет пен мемлекеттік құрылымдар арасындағы ынтымақтастықты нығайтуға, сондай-ақ болашақ мамандардың кәсіби құзыреттерін дамытуға маңызды үлес қосты.

25 қараша 2025 жылы Астана халықаралық университетінің Жаратылыстану жоғары мектебінде «Geonavigator: Туризм территориясы» атты зияткерлік байқау өтті. Байқауға «Рекреациялық география және туризм» білім беру бағдарламасының 2-3 курс студенттері қатысты.

Сайысқа үш команда - «Меридиан», «Nomad» және «GeoVision» қатысып, экономикалық, әлеуметтік және саяси география салалары бойынша терең білімдерін, логикалық ойлау қабілеттерін және командамен жұмыс істеу дағдыларын көрсетті. Барлық кезеңдердің нәтижесі бойынша жоғары дайындық танытып, тапсырмаларды сенімді орындаған «Nomad» командасы жеңімпаз атанды.

Іс-шараны Жаратылыстану жоғары мектебінің оқытушылары Жанабаева С.А., Смаилов А.А. және Авезова А.А. ұйымдастырып, байқаудың кәсіби деңгейде өтуіне және конструктивті жарыс атмосферасының қалыптасуына үлес қосты.

Байқаудың тұрақты даму мақсаттарының 4 міндеті  «Сапалы білім» аясында жүзеге асырылды. Іс-шара студенттердің сыни ойлау қабілетін, практикалық дағдыларын дамытуға, командалық жұмысты нығайтуға және география мен туризм саласына қызығушылықты арттыруға бағытталды.

Мұндай бастамалар университет студенттерініңің оқу мотивациясын көтеріп, олардың ғылыми көзқарасын кеңейтеді әрі теориялық білімді тәжірибеде қолдануға мүмкіндік береді. Қатысушылар ұйымдастырушыларға алғыс білдіріп, мұндай іс-шаралардың кәсіби қалыптасуға ерекше ықпал ететінін атап өтті

2025 жылғы 27 қараша күні Астана халықаралық университеті академик Е.А. Букетов атындағы Қарағанды ұлттық зерттеу университетімен бірлесе отырып «Тамырлы өсімдіктерді анатомиялық зерттеудің ерекшеліктері» атты ғылыми семинар өткізеді.

Іс-шара BR21882166 мақсатты қаржыландыру бағдарламасы аясында ұйымдастырылып отыр. Бағдарлама Қазақстан өңірлерінің табиғи флорасындағы жеміс-жидек өсімдіктерін зерттеу мен сақтауға, сондай-ақ елдің азық-түлік қауіпсіздігін қамтамасыз етуге бағытталған.

Семинар жұмысына биология және ботаника саласындағы жетекші мамандар: Салтанат Ұшкемпірқызы Тлеукенова, Маргарита Юлаевна Ишмуратова,
Роза Тлетаевна Мусина қатысады.

Ғылыми семинар 2025 жылғы 27 қараша күні Астана халықаралық университетінің 207-аудиториясында өтеді. Басталуы - сағат 10:00-де, аяқталуы - сағат 14:00-де.

Астана халықаралық университетінде 20 қараша күні Университеттің Психологиялық қызметі ұйымдастырған студенттерге арналған экспресс-кеңес шарасы өтті. Іс-шараның негізгі мақсаты - жастарға эмоционалдық қолдау көрсету, ішкі күйзелістерді анықтау және оларды жеңілдету жолдарын түсіндіру болды.

Шара кезінде 60-тан астам студент мамандармен жеке әңгімелесіп, өз сезімдері мен ойларын түсіну, мазасыздықты төмендету, шиеленісті басқару және жеке мәселелерді шешу бойынша кәсіби кеңес алды. Стресс, шаршау, мотивацияның төмендеуі, өз-өзіне сенімсіздік, қорқыныш, жаңа ортаға бейімделу секілді жиі кездесетін мәселелер талқыланды.Осындай шараға университеттің практик психологтары мен шақырылған мамандар қатысып, студенттерге қажетті психологиялық қолдау көрсетті. Экспресс-кеңестер бас ғимараттың 1-қабатында өткізілді. Сонымен қатар университет қызметкерлері де психологтардан жеке кеңес алып, кәсіби қолдауға жүгінді.

Іс-шара барысында студенттерге университет жанындағы Психологиялық қызметтің тұрақты түрде жұмыс істейтіні, толыққанды консультацияларды тегін алу мүмкіндігі бар екені туралы ақпарат ұсынылды.

Астана қаласындағы Рахмадиев атындағы мемлекеттік академиялық филармонияда Астана халықаралық университетінің жаңа оқу жылына арналған «SQQ Party - 2025» салтанатты қабылдау кеші ұйымдастырылды. Ерекше форматта өткен шараға университеттің профессор-оқытушылар құрамы, студенттер және шақырылған қонақтар қатысты.

Кеш басталғанда арнайы дайындалған бейнеролик көрсетіліп, «Дудар-ай» музыкалық композициясы мерекелік ахуал қалыптастырды. Шараны жүргізген Ерасыл Жұмағалиев пен Ескендір Қимаш көрерменге көтеріңкі көңіл күй сыйлады.

Салтанатты жиынды Астана халықаралық университетінің вице-президенті Қайрат Амангелдіұлы Абдрахманов ашып, білім ордасына қабылданған бірінші курс студенттерін құттықтады. Ол өз сөзінде білім жолындағы табандылықтың, жауапкершіліктің және ізденістің маңызын атап өтті.

Іс-шара барысында университеттің жеті жоғары мектебінің студенттері «Z буынының өзгерісі» тақырыбында 7 минуттық мюзикл-көріністер ұсынып, өз шығармашылық әлеуетін көрсетті. Байқауды бағалаған қазылар алқасының құрамына мемлекеттік органдардың өкілдері, жастар ұйымдарының мүшелері және университет басшылығы болды.

Кеш барысында AIU өнер ұжымдары да сахна төрінде өнер көрсетті. Кешті Дудар-ай тобы, ұлттық дәстүрді дәріптейтін «Аманат» ансамблі, «Бегім-ай» би тобы, сондай-ақ «AIU Tunes», «Dancing High», «Sheker Jaidarman» және «Ozge» театры жиналған жұртшылықтың ыстық ықыласына бөленді.

Кеш қорытындысында үздік деп танылған жоғары мектептер марапатталды. Гран при - Жоғары құқық мектебіне, І орын - Педагогика институтына, ІІ орын - Ақпараттық технологиялар және инженерия жоғары мектебіне, ІІІ орын - Экономика жоғары мектебіне бұйырды. Сонымен қатар өнер және гуманитарлық ғылымдар жоғары мектебі, жаратылыстану ғылымдары жоғары мектебі және BLCU белсенді қатысқаны үшін арнайы марапатталды. Кеш соңында студенттерге арналған музыкалық сый ретінде белгілі әнші Қуандық Рахым өнер көрсетті.

AIU-да дәстүрге айналған мұндай шаралар жастардың жаңа ортаға бейімделуіне, шығармашылық қабілетін ашуға және білім мен өнердің құндылығын насихаттауға бағытталған. Биылғы қабылдау кеші - жас талапкерлердің студенттік өмірге жасаған маңызды қадамы, ал университет үшін болашақ мамандарды тәрбиелеудегі тағы бір жарқын кезең болды.