AIU мен Қытайдың Ляньюньган қаласы арасындағы жаңа серіктестік

2026 жылдың 12 маусымында Елордамыз Астанада үлкен әрі маңызды кездесу өтті. Астана халықаралық университетіне Қытайдың Ляньюньган қаласынан (Цзянсу провинциясы) арнайы үкімет делегациясы келді. Бұл іс-сапар біздің университет үшін де, екі ел арасындағы достық пен ғылымды дамыту үшін де өте маңызды қадам.

Қонақтар алдымен EXPO аумағында орналасқан Азия-Еуропа жаңа құрлықтық-теңіз көлік дәлізі ғылыми-зерттеу институтына (ҚТК ҒЗИ) және BLCU Kazakhstan филиалына соқты. Онда құрметті қонақтарымыз атқарып жатқан жұмыстармен танысып, университет ғалымдарының баяндамаларын тыңдады. Онан соң делегация жаңа корпусымызда орналасқан Мұражай жәдігерлерін тамашалады. Бұл кездесу екі елдің мәдениеті мен тарихы қаншалықты жақын екенін тағы бір мәрте көрсетті. Сапар соңында екі жақты ресми келіссөздер жүргізілді.

Кездесуге Қытай тарапынан өте мәртебелі қонақтар қатысты. Олардың ішінде Ляньюньган қаласы әкімінің орынбасары У Ганьюй ханым, Порт істері жөніндегі басқарма басшысының орынбасары Сунь Гуанъинь мырза, Еркін сауда аймағы бөлімінің бастығы Чжун Кай мырза, Үкімет кеңсесі хатшылығының өкілі Чжан Ао мырза және аудармашы Цао Хайся ханым болды. 

Талқы барысында университет Президенті Серік Ирсалиев пен Ляньюньган қаласы әкімінің орынбасары У Ганьюй ханым жылы лебіздерін білдіріп, бірлескен жобаларды ортаға салды. Тараптар Қазақстан мен Қытай арасындағы жүк тасымалы, жаңа контейнерлік хабтар мен порттардың жұмысы өте жақсы дамып келе жатқанын атап өтті. Сонымен қатар, «Қытай — Орталық Азия» бағыты бойынша логистика мен бизнесті жеңілдету үшін заманауи цифрлық жүйелерді енгізу мәселесі сөз болды.

Қытайлық қонақтар біздің Астана халықаралық университетімен серіктестікке өте жоғары баға берді. Олар AIU-мен бірлескен жұмысты Қазақстандағы ең үздік және ең нәтижелі жоба деп атап өтті. Ең бастысы, Қытай тарапында басшылық ауысса да, жаңа басшылар бұл жобаларды әрі қарай толық қолдайтынын және мемлекет деңгейінде көмек көрсететінін жеткізді.

Кездесу қорытындысы бойынша болашаққа үлкен жоспарлар қойылды. Ендігәрі екі тарап «жасыл» сауданы дамытуға және трансшекаралық электронды коммерцияны (интернет-дүкендер мен онлайн сауда жүйелерін) біріктіруге келісті. Сондай-ақ, логистика саласын цифрландыру бойынша бірлескен ғылыми зерттеулер жүргізіледі. Тағы бір қызықты жаңалық: Ляньюньган қаласының беделді теңіз университеттері мен Астана халықаралық университеті арасында тікелей байланыс орнап, студенттер мен оқытушылар үшін жаңа мүмкіндіктер ашылмақ.